احذروا ضريبة القيمة المضافة الباهظة وخاصة على الوجبات الجاهزة

ضريبة القيمة المضافة تصفع مواطن قلم حارا لن ينساه 

 

مواطن يسرد تجربته في احد المولات المشهورة : 

امبارح كنت في Carina wear فرع المعادي جراند مول .. وكان فيه عرض علي كل القطع الموجودة في الفرع بمناسبة رأس السنة .. وطبعا اسعار الملابس موجودة علي كل قطعة .. وكان معايا صديقة ليا دفعت حسابها الاول واخدت فاتورتها الأول!! .. وانا بحاسب علي حاجتي بعدها علطول لاقيت الحساب فيه زيادة عن الاسعار الموجودة علي الحجات اللي اشتريتها !! ف سألت الموظف الموجود علي الكاشير عن سبب الزيادة الغريبة دي !! .. لاقيته طبعا ارتبك وقال إن فيه ضريبة ١٤ % مضافة علي توتال الفاتورة !! .. وان دي ضريبة بدأ تطبيقها فقط من يومين !!

 

طبعا احنا ماكناش نعرف حاجة عن موضوع الضريبة دة قبل مانشتري !! .. وطبعا واحنا علي الكاشير الموظف ماقلناش حاجة عن أن فيه زيادة علي قيمة الفاتورة !! وطبعا احنا ماكتشفناش الزيادة دة غير بعد ما الفاتورة طلعت !! والمعروف طبعا أن ايام العروض لا يوجد استرجاع طالما الفاتورة طلعت !!

طبعا دة موقف مش محترم في نظري .. علي الاقل كان لازم يبقي فيه تنبيه أو لوحة مكتوب فيها قيمة الضريبة المضافة المفاجأة دى !! .. أو حتي الشركة نفسها تضيفها علي اسعار الملابس مباشرة !!

وكان ليهم موقف سابق مشابه معايا في فرع حلوان .. كانوا كاتبين سعر علي بعض الملابس كان عليها عروض تخفيضات .. بعد ما طلعت الفاتورة لاقيت الاسعار اغلي من اللي مكتوب عليها .. وسألت الموظفة وقتها عن فرق السعر !! قالتلي أن سعرها ارتفع من فترة !! .. طيب ليه ماغيرتوش السعر القديم !! .. قالتلي أن كل الناس عارفة أن السعر اتغير !!

بصراحة دى تصرفات مستفزة جدددددا !!